Din que o nome imprime carácter. Pregúntome, que é o que levou os meus bisavós a poñer ó seu fillo máis novo, o nome de Aurentin. Conta a historia que lle chamaron así por un enxeñeiro francés, que a finais do século XIX, traballaba na zoa, na construcción da liña férrea, que unía Galicia coa meseta. Eran tempos de “mesianismo ferroviario”.

 

O tren era unha promesa de progreso e modernidade. Iso era o que os seus pais querían para o meu avó: progreso e modernidade. Aurentin era unha invocación para rematar co meigallo da escaseza e fame na familia. O seu nome acochaba un anhelo de abundancia.

 

Estación de tren de Monforte de Lemos. 1885. Foto: J. Lauren 

 

Cando a vida do meu avó chegaba ó seu fin, as súas mans eran ásperas e o seu brillo era máis interior que exterior. Aurentin non foi quen de enriquecerse materialmente. Mais a historia interiorizada do seu nome lembráballe que tiña a obriga de brillar como o ouro, aínda que fose dun xeito calado. Aurentin tiña un algo de dignidade e elegancia no seu porte. Había sobriedade e grandeza na súa face.

 

A súa biografía estivo marcada polo seu nome francés, que lle vinculaba irremediablemente co pensamento ilustrado, a loita pola liberdade, igualdade e fraternidade e o amor romántico.

 

Amor romántico, si…. A voda clandestina dos meus avós é un capítulo fundamental da historia familiar. Un acto de subversión da orde establecida ou modernidade en estado puro. Os noivos, coa complicidade dalgúns familiares e amigos, fuxiron a Ourense para se casar. Ás agachadas, camiñaron ata Monforte, para logo apañar o tren a Ourense. Fai case cen anos daquilo. Imaxinades? Era o que se diría, un matrimonio morganático, porque Aurentin era pobre e a miña avoa, filla dun propietario. Pode que Aurentin non tivese ouro, pero dalgún xeito era ouro. Así que, pasado o tempo, o pai da miña avoa descubriu a grandeza de Aurentin e aceptouno coma se fose fillo de sangue.

 

 

La libertad guiando al pueblo. Eleazar

 

 

E ti, queres coñecer a historia do teu nome? Sabes quen cho puxo e por qué? O teu nome é novo na familia ou tradicional? Queres saber o que o teu nome esconde?